Монгол Улсын Их Хурлын дарга М.Энхболд Бүгд Найрамдах Социалист Вьетнам Улсаас Монгол Улсад суугаа Элчин сайд Доан Тхи Хыөнгийг хүлээн авч уулзлаа. Тэрбээр Монгол Улсад суух Элчин сайдаар томилогдож, өнгөрсөн наймдугаар сард Монгол Улсын Ерөнхийлөгчид итгэмжлэх жуух бичгээ барьсанд нь баяр хүргээд, ажлын амжилт хүсэв.
УИХ-ын дарга М.Энхболд сүүлийн жилүүдэд хоёр орны харилцаа идэвхжиж, дээд өндөр түвшний төлөөлөгчдийн харилцан айлчлал тогтмолжиж байгаад сэтгэл ханамжтай байгаагаа илэрхийлээд, “2017онд Вьетнам Улсын Дэд ерөнхийлөгч Монгол Улсад, манай Гадаад харилцааны сайд Вьетнам Улсад айлчилж, Засгийн газар хоорондын комиссын хуралдаан Улаанбаатар хотноо амжилттай зохион байгуулагдсан гээд онцлог, чухал үйл явдлууд болж өнгөрлөө”гэж тэмдэглэв.
Тэрбээр хоёр орны хууль тогтоох дээд байгууллага хоорондын хэлхээ холбоо гүнзгийрэн бэхжиж, парламент дахь найрамдлын бүлэг, Байнгын хороод болон Тамгын газар хоорондын харилцаа, хамтын ажиллагаа өргөжиж байгаад сэтгэл ханамжтай байгаагаа илэрхийлэв.
Хатагтай Доан Тхи Хыөнг хүлээн авч уулзаж буйд нь Монгол Улсын Их Хурлындарга М.Энхболдод талархал илэрхийлээд, Вьетнамын Үндэсний Ассамблейн даргын мэндчилгээг уламжлав. Түүнчлэн ирэх оны эхээр болох Ази, Номхон далайн парламентын чуулганы хуралдаанд оролцохыг урилаа.
Хатагтай Доан Тхи Хыөнг “Манай хоёр орон уламжлалт сайн харилцаатай. Манай улстай дипломат харилцаа тогтоосон 13 дахь улс нь Монгол. Бид энэ жил дипломат харилцааны 63 жилийн ойгоо тэмдэглэлээ. Манай ард түмэн, Үндэсний Ассамблейн гишүүд бидний нөхөрсөг харилцааг гүнээ хүндэтгэдэг бөгөөд ялангуяа дайны хүнд хэцүү цагт та бүхний үзүүлсэн тусламж дэмжлэгийг ямагт талархан дурсаж байдаг” гэлээ. Мөн Элчин сайдаар ажиллах хугацаандаа хоёр орны харилцааг бүхий л салбарт өргөжүүлэхийн төлөө хичээн ажиллах болно. Та бүхэн, ялангуяа Монгол Улсын Их хурал тусалж дэмжинэ гэдэгт итгэлтэй байна гэв.
УИХ-ын дарга М.Энхболд хоёр орны хамтын ажиллагааг хөгжүүлэх чиглэлээрх Элчин сайдын үйл ажиллагааг бүхий л талаар дэмжихээ илэрхийлээд, “Хоёр орны худалдаа, эдийн засгийн хамтын ажиллагааг цаашид өргөжүүлэх нь нэн чухал юм. Энэ онд болсон Засгийн газар хоорондын комиссын хуралдаанаар 2020 он гэхэд худалдааны эргэлтийг 70.0 сая ам.долларт хүргэх зорилт тавьсан. Хөдөө аж ахуй, аялал жуулчлал, хөнгөн, хүнсний үйлдвэрийн салбарт хамтран ажиллах өргөн боломж бидэнд бий. Монголоос мах, махан бүтээгдэхүүн, боловсруулсан арьс шир, Вьетнамаас тахиа, гахайн гүн хөлдөөсөн мах харилцан экспортлох талаар Комиссын хуралдаанаар ярьж тохирсон. Эдгээр зорилтыг ажил хэрэг болгох нь чухал юм. Хоёр орны харилцаа аль болох олон салбарыг хамарсан, харилцан тэнцвэртэй, үр ашигтай байх нь бидний эрх ашигт нийцнэ хэмээн онцоллоо.
Тэрбээр Вьетнам Улс энэ оны 11 дүгээр сард АПЕК-ийн дээд хэмжээний уулзалтыг амжилттай зохион байгуулсанд баяр хүргээд, Монгол Улс АПЕК-т элсэх, Зүүн Азийн дээд түвшний уулзалтад оролцох сонирхолтой бөгөөд үүнд Вьетнам Улс цаашид ч идэвхтэй дэмжлэг үзүүлж, хамтран ажиллана гэдэгт найдаж байна гэв.
Хатагтай Доан Тхи Хыөнг энэ асуудлыг Вьетнам Улс идэвхтэй дэмжсээр ирсэн, цаашид ч хэвээр үргэлжилнэ гэдгийг хэлээд худалдаа, эдийн засгийн хамтын ажиллагааны боломжийг сайтар ашиглаж, өргөжүүлэхэд онцгой анхаарах болно, энэ үйл хэрэгт дамжин өнгөрөх тээврийн асуудал нэн чухалтул Вьетнам-Хятад-Монголын тээврийн гурвалсан харилцаанд онцгой анхаарал хандуулах шаардлагатай байгааг онцоллоо гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.
Монгол Улсын Их Хурал, Вьетнамын Үндэсний Ассамблейн хооронд хамтран ажиллах Протокол, тэдгээрийн Тамгын газруудын хооронд хамтран ажиллах Протоколд 2003, 2014 онд тус тус гарын үсэг зуржээ. Вьетнам, Монголын парламентын бүлэг, Монгол, Вьетнамын бүлгийн дарга нар 2005 онд харилцан айлчилсан. УИХ, Үндэсний Ассамблейн Тамгын газрын төлөөлөгчид, Парламентын болон Байнгын хороодын гишүүд жил бүр харилцан айлчилж туршлага солилцож ирсэн байна.
